काठमाडौं । भारतको नयाँदिल्लीमा सम्पन्न १८औँ ब्रिक्स शिखर सम्मेलनले परम्परागत, पूरक तथा एकीकृत चिकित्सालाई सदस्य राष्ट्रबीचको स्वास्थ्य सहकार्यको महत्त्वपूर्ण एजेन्डाका रूपमा अघि बढाउने निर्णय गरेको छ।

नयाँदिल्ली घोषणापत्रले ब्रिक्स स्वास्थ्य ट्र्याकअन्तर्गत टीसीआईएम (परम्परागत, पूरक तथा एकीकृत चिकित्सा) सम्बन्धी विज्ञ कार्यसमूह गठन गर्ने प्रस्तावलाई स्वागत गरेको छ। प्रस्तावित कार्यसमूहले सदस्य राष्ट्रबीच परम्परागत चिकित्सासम्बन्धी अनुसन्धान, ज्ञान आदानप्रदान, नीतिगत संवाद तथा नियामकीय सहकार्यलाई संस्थागत गर्ने अपेक्षा गरिएको छ।

भारतका आयुष मन्त्री प्रतापराव जाधवले टीसीआईएमलाई घोषणापत्रमा समेटिनु परम्परागत चिकित्सामा विश्वव्यापी सहकार्य विस्तार गर्ने महत्त्वपूर्ण कदम भएको बताएका छन्। कार्यसमूहले अनुसन्धान विस्तार, प्रमाणमा आधारित अभ्यास र अनुभव आदानप्रदानका लागि साझा मञ्च उपलब्ध गराउने उनको भनाइ छ।

घोषणापत्रमा औषधीय वनस्पति तथा जडीबुटीजन्य तयारीमा संयुक्त अनुसन्धान बढाउन पनि जोड दिइएको छ। साथै, गुणस्तर, सुरक्षा र प्रभावकारिता सुनिश्चित गर्न प्रमाणमा आधारित नियामकीय व्यवस्था सुदृढ गर्नुपर्ने उल्लेख छ।

यो पहल भारतको ब्रिक्स अध्यक्षताका क्रममा गत जुलाईमा चण्डीगढमा भएको टीसीआईएम बैठकको निरन्तरता हो। उक्त बैठकमा अनुसन्धान, शिक्षा, ज्ञान आदानप्रदान र नियामकीय सहकार्यका विषयमा सदस्य राष्ट्रबीच सहमति भएको थियो।

यो निर्णय विश्व स्वास्थ्य संगठनको २०२५–२०३४ को विश्व परम्परागत चिकित्सा रणनीतिसँग समेत मेल खाने बताइएको छ। उक्त रणनीतिले परम्परागत चिकित्सामा वैज्ञानिक प्रमाण, गुणस्तर र सुरक्षालाई प्राथमिकता दिएको छ।