काठमाडौं । नेपाल स्वास्थ्य व्यवसायी परिषद्को अध्यक्षमा जनस्वास्थ्य विज्ञ तथा स्वास्थ्य नीति र स्वास्थ्य प्रणाली विशेषज्ञ सगुन पौडेल नियुक्त हुनुभएको छ।

स्वास्थ्य क्षेत्रमा १३ वर्षभन्दा बढीको अनुभव हासिल गर्नुभएका पौडेलले समुदायस्तरका स्वास्थ्य संस्थादेखि स्वास्थ्य तथा जनसंख्या मन्त्रालय तथा विभिन्न राष्ट्रिय तथा अन्तर्राष्ट्रिय संस्थामा प्राविधिक र नेतृत्वदायी भूमिकामा काम गर्नुभएको छ।

उहाँले विश्व स्वास्थ्य संगठन (डब्लुएचओ) नेपाल, आरटीआई इन्टरनेसनल, अन्तर्राष्ट्रिय रेडक्रस तथा क्यानडियन रेडक्रस, यूएस फार्माकोपिया र क्राउन एजेन्ट्सलगायत संस्थामा विभिन्न प्राविधिक तथा नेतृत्वदायी जिम्मेवारी सम्हाल्नुभएको छ।

पौडेलको प्रमुख कार्यक्षेत्र स्वास्थ्य प्रणाली सुदृढीकरण, स्वास्थ्य नीति तथा योजना, स्वास्थ्य क्षेत्रको वित्तीय व्यवस्थापन, स्वास्थ्य जनशक्ति विकास तथा कार्यान्वयन अनुसन्धान रहँदै आएको छ।

शैक्षिक रूपमा उहाँले बेलायतको लन्डन स्कुल अफ हाइजिन एन्ड ट्रपिकल मेडिसिन तथा लन्डन स्कुल अफ इकोनोमिक्सबाट स्वास्थ्य नीति, योजना तथा वित्तसम्बन्धी स्नातकोत्तर अध्ययन गर्नुभएको छ। इन्डोनेसियाको योग्याकार्तास्थित गाड्जाह माडा विश्वविद्यालयको चिकित्सा, जनस्वास्थ्य तथा नर्सिङ संकायबाट सन् २०१९ मा जनस्वास्थ्यमा स्नातकोत्तर उपाधि हासिल गर्नुभएका पौडेलले पोखरा विश्वविद्यालयबाट जनस्वास्थ्यमा स्नातक गर्नुभएको छ।

नवनियुक्त अध्यक्ष पौडेलले परिषद्को नेतृत्व गर्दै स्वास्थ्य व्यवसायको गुणस्तर अभिवृद्धि, व्यावसायिक मापदण्डको विकास, प्रभावकारी नियमन तथा स्वास्थ्य व्यवसायीहरूको क्षमता विकासलाई थप व्यवस्थित बनाउन भूमिका खेल्ने अपेक्षा गरिएको छ।